नागपूर : ‘जीएसटी आणि भारतीय अर्थव्यवस्था’ या विषयावर केंद्रीय रस्ते वाहतूक आणि जहाजबांधणी मंत्री नितीन गडकरी यांचे २३ जुलै रोजी नागपूर येथे व्याख्यान होणार आहे. ‘दी हितवाद’ या इंग्रजी दैनिकाने संस्थापक गोपाळ कृष्ण गोखले यांच्या स्मृतिप्रीत्यर्थ हे व्याख्यान आयोजित केले आहे.
या व्याख्यानात गडकरी ‘जीएसटी’तील तरतुदी समजावून सांगण्याबरोबरच जीएसटी लागू करण्याची पार्श्वभूमी विशद करणार आहेत. तसेच ते या वेळी ‘जीएसटी’बाबतच्या श्रोत्यांच्या प्रश्नांना उत्तरेदेखील देतील.
व्याख्यानासाठी ‘प्रथम येणाऱ्यास प्राधान्य’ या तत्त्वावर प्रवेश दिला जाणार असल्याने, श्रोत्यांनी कार्यक्रम सुरू होण्यापूर्वी पंधरा मिनिटे सभागृहात उपस्थित राहावे, असे आवाहन आयोजकांनी केले आहे.
कार्यक्रमाविषयी :
व्याख्यान : जीएसटी आणि भारतीय अर्थव्यवस्था
दिवस : रविवार, २३ जुलै २०१७
वेळ : सायंकाळी पाच वाजता
स्थळ : डॉ. वसंतराव देशपांडे सभागृह, नागपूर
